МАТЭРЫЯЛЫ КРЫМІНАЛЬНАЙ СПРАВЫ Ў ДАЧЫНЕННІ ДА А.КАЗУЛІНА ПЕРАДАДЗЕНЫ Ў СУД МАСКОЎСКАГА РАЁНА МІНСКА

2006-06-21 12:08

Аўтар: Вячаслаў БУДКЕВІЧ, БелаПАН.

Мінск, 21 чэрвеня. 21 чэрвеня пракуратура Мінска накіравала для разгляду па сутнасці ў суд Маскоўскага раёна сталіцы крымінальную справу па абвінавачанні лідэра Беларускай сацыял-дэмакратычнай партыі (Грамада), экс-кандыдата ў прэзідэнты Аляксандра Казуліна ва ўчыненні злачынстваў, прадугледжаных часткай 2 артыкула 339 (злоснае хуліганства) і артыкулам 342 (арганізацыя групавых дзеянняў, што парушаюць грамадскі парадак, або актыўны ўдзел у іх) Крымінальнага кодэкса Рэспублікі Беларусь. Пра гэта БелаПАН паведаміў начальнік упраўлення прававога забеспячэння, інфармацыі і грамадскіх сувязей рэспубліканскай пракуратуры Андрэй Швед. Ён зазначыў, што ч. 2 арт. 339 КК прадугледжвае пакаранне аж да пазбаўлення волі на тэрмін ад аднаго да шасці гадоў.
Варта зазначыць, што толькі 20 чэрвеня матэрыялы крымінальнай справы ў дачыненні да А.Казуліна паступілі з ГУУС Мінгарвыканкама ў пракуратуру горада, і, у адпаведнасці з Крымінальна-працэсуальным кодэксам, пракурор меў права на працягу пяці дзён знаёміцца са справай для прыняцця рашэння або аб яго перадачы ў суд, або аб накіраванні на даследаванне.
Лідэр БСДП (Грамада) быў затрыманы падчас правядзення масавай акцыі пратэсту 25 сакавіка гэтага года ў Мінску. 30 сакавіка яму было прад'яўлена абвінавачанне па трох эпізодах: па падзеях 17 лютага і 2 сакавіка - ч. 2 арт. 339 КК; па падзеях 25 сакавіка - арт. 342 КК.