КДБ ЛІЧЫЦЬ ПРАВАКАЦЫЯЙ АНАНІМНЫ ЛІСТ З ІНФАРМАЦЫЯЙ АБ СУПРАЦОЎНІКАХ СПЕЦПАДРАЗДЗЯЛЕННЯЎ, ЯКІЯ ЎДЗЕЛЬНІЧАЛІ Ў ЗБІВАННІ А.КАЗУЛІНА ПАДЧАС ВЫБАРАЎ ПРЭЗІДЭНТА

2006-06-15 17:55

Аўтар: Вячаслаў БУДКЕВІЧ, БелаПАН.

Мінск, 15 чэрвеня. "Правакацыяй" і "няўдалай фальшыўкай" назваў у гутарцы з карэспандэнтам БелаПАН начальнік Цэнтра інфармацыі і грамадскіх сувязей КДБ Беларусі Валерый Надтачаеў паведамленне пад назвай "Інфармацыя для СМІ аб супрацоўніках спецпадраздзяленняў, якія ўдзельнічалі ў збіванні кандыдата ў прэзідэнты Рэспублікі Беларусь Аляксандра Казуліна і іншых актывістаў апазіцыі падчас выбараў прэзідэнта ў 2006 годзе". За подпісам "Патрыёты Беларусі. Супрацоўнікі Камітэта дзяржаўнай бяспекі Рэспублікі Беларусь" ён быў атрыманы па электроннай пошце шэрагам СМІ, у тым ліку інфармацыйнай кампаніяй БелаПАН.
Каментаваць "правакацыю" В.Надтачаеў адмовіўся.
У паведамленні, у прыватнасці, адзначаецца, што "для нейтралізацыі А.Казуліна і актывістаў яго штаба была створана спецыяльная група з прадстаўнікоў розных сілавых структур, якія выконвалі асабістыя даручэнні кіраўніка дзяржавы", "у яе ўваходзілі найбольш правераныя людзі".
Аўтары паслання сцвярджаюць, што "дагэтуль не ўстаноўлена месцазнаходжанне трох чалавек, якія прапалі падчас акцыі 25 сакавіка 2006 года". "Мы поўнасцю пацвярджаем інфармацыю ананімнай сведкі, якая была відавочцам, што ад атрыманых ран памёр малады хлопец і быў тайна крэміраваны", - гаворыцца ў лісце.
Ананімы прыводзяць прозвішчы супрацоўнікаў спецпадраздзялення па барацьбе з тэрарызмам "Алмаз" МУС, палка міліцыі спецыяльнага прызначэння (ПМСП) ГУУС Мінгарвыканкама, брыгады аператыўнага прызначэння ўнутраных войскаў МУС, Кастрычніцкага РУУС Мінска, якія, паводле іх звестак, 2 сакавіка "ў памяшканні Палаца культуры і спорту чыгуначнікаў і каля будынка Кастрычніцкага РУУС" прымянялі сілу "ў дачыненні да кандыдата ў прэзідэнты А.Казуліна, яго давераных асоб і журналістаў", а 25 сакавіка "па загадзе камандзіра ПМСП Юрыя Падабеда" затрымлівалі А.Казуліна і потым даставілі яго пад канвоем у СІЗА Жодзіна.