ВЫБАРШЧЫКАМ НЕ ХАПАЕ IНФАРМАЦЫI ПРА КАНДЫДАТАЎ? ("Звязда")

2003-02-22

Аўтар: Аўтар: Сяргей Протас

Аляксандр ТАРАСЁНАК, выкладчык кафедры міжнароднага турызму Беларускага дзяржаўнага універсітэта:

- На выбары, хутчэй за ўсё, пайду. Чаму няўпэўнены? Не ведаю кандыдатаў, якія ідуць па нашаму ўчастку. Раней напярэдадні выбараў у паштовыя скрынкі лістоўкі кідалі, буклеты розныя, сходы праводзілі. Сёлета пра людзей, якія хочуць прадстаўляць інтарэсы жыхароў нашай акругі, распавядае хіба толькі "наглядная агітацыя" ў выглядзе некалькіх аркушаў паперы на бліжэйшым гастраноме ды ў паліклініцы. Праўда, час яшчэ застаўся. Можа што і зменіцца. Галасаваць буду за кандыдата, які зробіць стаўку на вырашэнне эканамічных праблем.

Сяргей ПАРОШЫН, член Камісіі па адукацыі, культуры, навуцы і навукова-тэхнічнаму прагрэсу Палаты прадстаўнікоў Нацыянальнага сходу Беларусі:

- Лічу, што не ісці на выбарчы ўчастак - гэта выказваць сваю непавагу да дзяржавы і яе грамадзян. Мы абіраем чалавека, які з'яўляецца прадстаўніком кожнага выбаршчыка ў пэўнай акрузе.

3 кандыдатаў, якія балаціруюцца па маёй акрузе (я жыву ў Гомелі), па дзелавых і чалавечых якасцях добра ведаю аднаго кіраўніка-жанчыну. Ёсць інфармацыя і пра іншых кандыдатаў. 3 выбарам я вызначыўся. Мой прынцып - галасаваць з улікам дзелавых якасцяў чалавека. Дэпутаты мясцовых Саветаў працуюць непасрэдна з людзьмі, таму лепш бачаць і адчуваюць праблемы выбаршчыкаў. Для нас, заканадаўчага органа ўлады, меркаванне і падказка дэпутатаў гэтага звяна пры распрацоўцы і прыняцці многіх заканадаўчых актаў вельмі важная.

Дзмітрый ГУШЧЫНСКІ, прыватны прадпрымальнік:

- На выбары абавязкова пайду, і перш за ўсё таму, што чакаю ад новага дэпутата вырашэння многіх эканамічных пытанняў нашага раёна. Спадзяюся, што ён дапаможа хутчэй знайсці "агульныя кропкі" ў інтарэсах мясцовай выканаўчай улады і прыватнага бізнэсу.

На жаль, інфармацыі пра кандыдатаў пакуль мала. Лічу, што выбары - гэта не той выпадак, калі "гара" - выбаршчыкі - павінна ісці да "Магамета" - кандыдата.