А КОЛЬКІ Ў ВАС ШТЫКОЎ?

2002-12-24

Аўтар: Сяргей ПУЛЬША, журналіст

Напярэдадні вылучэння кандыдатаў у дэпутаты мясцовых Саветаў партыі заяўлялі, што ў іх нямала гатовых да электаральнай бітвы "штыкоў". Каля 300 чалавек мелася выставіць Беларуская сацыял-дэмакратычная партыя (Народная Грамада). Каля 400 кандыдатаў рыхтавала Партыя БНФ, прыкладна столькі ж - Партыя камуністаў. Перыяд вылучэння ўжо пачаўся. Паводле слоў лідэраў партый, сваё абяцанне аб масавым вылучэнні яны выканаюць.

Старшыня БСДП (НГ) Мікалай Статкевіч, пакуль не можа назваць дакладную колькасць "сваіх" кандыдатаў у дэпутаты. Нягледзячы на тое, што колькасць магчымых прэтэндэнтаў на мандаты партыя спрабавала прыкінуць прыкладна за тры тыдні да пачатку вылучэння. Паводле слоў Статкевіча, аб выніках казаць пакуль не час:

- Канчатковыя лічбы мы будзем ведаць прыкладна 28 снежня. Цяпер ідзе праца па вылучэнні кандыдатаў у дэпутаты. Мы плануем выставіць прыкладна 300. Разам з тым пашыраецца кааліцыя: да трох партый сацыял-дэмакратычнага саюза - Народная Грамада, Партыя працы і камуністы Сяргея Калякіна - дадаліся яшчэ дзве. Гэта жаночая партыя "Надзея" і ліберальна-дэмакратычная. Так што наш перадвыбарны блок пашыраецца.

Лідэр Аб'яднанай грамадзянскай партыі Анатоль Лябедзька асабіста займаецца адборам кандыдатаў. Яго партыя будзе змагацца яшчэ і за станоўчую грамадскую думку:

- У гэты момант я езджу па рэгіёнах - учора быў у Віцебску, сёння еду ў Гродна. Мы ўдакладняем папярэднія спісы нашых кандыдатаў. Папярэдне мы туды запісвалі ўсіх, хто пажадаў браць удзел у перадвыбарнай барацьбе. Цяпер мы ацэньваем свае шанцы і пакідаем толькі канкурэнтаздольных прэтэндэнтаў. Мэта ж гэтай перадвыбарнай кампаніі - не толькі прайсці ў мясцовыя Саветы, але і пазмагацца за грамадскую думку. У тым ліку - і пазмагацца за яе шляхам нашых кандыдатаў.

Ужо ясна, што па Мінскай вобласці ў нас будзе 37-40 чалавек: у Жодзіне, Барысаве, Фаніпалі, Вілейцы. Каля 20 будзе па Мінску. Усяго па Беларусі мы плануем выставіць 200-230 чалавек.

Такім чынам, партыі плануюць выставіць нямала кандыдатаў. І, мяркуючы па сур'ёзным адборы персаналій, выбары пройдуць не так ужо нудна. Аднак...

Нават калі ўсе палітычныя партыі выставяць у суме тысячы дзве чалавек, вынік будзе ўнушальным толькі для саміх гэтых структур - яны пакажуць, што хутчэй жывыя, чым мёртвыя. У агульнай жа колькасці дэпутатаў, - а іх трэба абраць 24.055, - шчасліўчыкі з ліку гэтых двух тысяч проста згубяцца. Так што партыям варта яшчэ і планаваць работу з "не сваімі" кандыдатамі і дэпутатамі. Аднак гэта ўжо - пасля барацьбы за мандаты.

Ды і мала выставіць кандыдата ў дэпутаты. Улічваючы, колькі розных дакументаў спатрэбіцца, да кожнага прэтэндэнта трэба прыставіць спецыяльна навучанага чалавека для падрыхтоўкі гэтых дакументаў. Ад ступені падрыхтаванасці партый да папяровай працы будзе залежаць верагоднасць рэгістрацыі прэтэндэнтаў уласна кандыдатамі.