Падлік вынікаў галасавання на выбарах у маштабах краіны - доўгая і працаёмістая працэдура. Аднак для таго, каб ацаніць вынікі з дастаткова высокай дакладнасцю, не абавязкова суміраваць інфармацыю па ўсіх выбарчых участках. Дастаткова па спецыяльнай працэдуры выбраць іх адносна невялікую колькасць (5-10%) і, калі працэдура адбору не была парушана, то вынік выбараў па гэтых участках будзе блізкі да агульнага выніку. Пры гэтым памылка будзе тым менш, чым большы аб'ём выбаркі. Выбарачны падлік галасоў займае нашмат менш часу, чым падвядзенне канчатковых вынікаў; таму ён шырока выкарыстоўваецца ў большасці краін свету для папярэдняга аналізу вынікаў выбараў.

Пры выбарачным падліку галасоў выкарыстоўваецца не апытанне асобных выбаршчыкаў, а афіцыйныя звесткі ўчастковых выбарчых камісій. Выбарка ў гэтым даследаванні складае 500 участкаў - 7% ад іх агульнай колькасці. Гэта значыць, што калі на выбары прыйдзе мінімальна дапушчальная колькасць выбаршчыкаў (50%+1 чалавек), пры выбарачным падліку будуць улічаны галасы 7% усіх прагаласаваўшых - больш за 500 тыс. чалавек, якія жывуць ва ўсіх гарадах і сельскіх раёнах нашай краіны. У гэтым выпадку памылка выбаркі (рознасць паміж вынікамі галасавання па выбарцы і па ўсіх выбарчых участках) не перавысіць 1% з верагоднасцю 95%. Напрыклад, калі адзін з кандыдатаў набярэ па выбарцы не менш за 51% галасоў, то з верагоднасцю 95% можна будзе сцвярджаць, што ён перамог у першым туры. Калі яўка выбаршчыкаў будзе вышэйшай, то ўзрасце і колькасць улічаных галасоў у нашым даследаванні, а значыць і яго дакладнасць.

Участкі для выбарачнага падліку галасоў адбіраліся ў Мінску, абласных цэнтрах, гарадах і сельскай мясцовасці ўсіх абласцей Рэспублікі Беларусь. Для гэтага ўся тэрыторыя РБ была падзелена на 18 страт. Стратай назыаюць структурную частку поўнай сукупнасці аб'ектаў (Dictionary of Statistics and Methodology; W.Paul Vogt, SAGE Publications, 1993).

У нашым выпадку - гэта выбарчыя ўчасткі, выдзеленыя па двух крытэрыях - вобласць і тып населенага пункта (сталіца, абласны цэнтр, іншыя гарады і сёлы). Страты характэрныя ўнутранай аднароднасцю аб'ектаў (выбарчых участкаў).

Колькасць участкаў у кожнай страце вызначалася ў залежнасці ад колькасці выбаршчыкаў у адпаведнай страце (табліца 1) і сярэдняй колькасці выбаршчыкаў на адным участку (табліца 2). Пры гэтым аб'ём выбаркі ў кожнай асобна ўзятай страце не мог быць менш за 20 участкаў. Размеркаванне аб'ёму выбаркі па стратах прадстаўлена ў табліцы 3. Для кожнай страты быў складзены поўны спіс выбарчых участкаў. Адбор участкаў з гэтага спіса праводзіўся з дапамогай камп'ютэра (праграмы-датчыка раўнамерна размеркаваных выпадковых лічбаў). Згодна са статыстычнай тэорыяй, менавіта такая працэдура выпадковага стратыфіцыраванага адбору забяспечвае найлепшую дакладнасць і надзейнасць вынікаў выбарачнага даследавання.

Табліца 1. Колькасць выбаршчыкаў у стратах