ЗАЯВА НАТАЛЛІ МАШЭРАВАЙ ДЛЯ ІНФАРМАЦЫЙНАЙ КАМПАНІІ БелаПАН

2001-07-05

"Я ішла на выбары за… "трэці шлях" развіцця нашай краіны, - сказала Н.Машэрава. - І як незалежны кандыдат імкнулася стварыць перадумовы для выбараў не па прынцыпу супрацьстаяння, а дзеля кансалідацыі грамадства. Відаць, што грамадства да гэтага пакуль яшчэ не гатова. Відавочна, што неабходная папярэдняя, старанная падрыхтоўка, каб мы перасталі дзяліцца на "нашых" і "вашых", а многія палітыкі навучыліся б мысліць канструктыўна і толькі на карысць народа"

У рэспублікі яшчэ ёсць шанц выйсці з крызісу, але толькі разам. Не сакрэт, без майго ўдзелу было выстраена мноства сцэнарыяў, але ўсе яны не маюць да мяне ніякага дачынення. Я не хачу жыць у заапарку і не з'яўляюся ні "падсадной вуткай", ні "траянскім канём", ні нават "вожыкам у тумане".

Я ўдзячная людзям, якія сваім даверам на першым этапе выбарчай кампаніі развеялі "туман нявызначанасці". Для мяне, як і зараз, свеціць сонца, таму што я веру ў будучае майго народа. І сваёй верай і надзеяй хачу падзяліцца з людзьмі.

Заклікаю ўсіх прэтэндэнтаў на прэзідэнцкую пасаду не траціць часу на бясплодную канфрантацыю, а браць удзел у выбарах празрыста і сумленна. Заклікаю народ Беларусі ўзяць у іх самы актыўны ўдзел. Ваш выбар і толькі ваш будзе асноватворным.

Сёння як дэпутат парламента і грамадзянін я выразна бачу недахопы нашага выбарчага заканадаўства. Яго неабходна кардынальна мяняць, таму што многія яго палажэнні шкодзяць правядзенню сумленных выбараў.

Мая першая спроба - гэта набыццё вопыту, праверка сітуацыі, што склалася ў рэспубліцы. Я не пакідаю палітыку. Буду працаваць спакойна, сумленна і прынцыпова".

5 ліпеня 2001 года.