НЕПАЖАДАНЫЯ НАЗІРАЛЬНІКІ ("Наша свабода")

2001-08-17

Аўтар: "Наша свабода", 17 жніўня 2001 г., стар. 1

Беларускія ўлады дэманструюць упартае нежаданне бачыць на выбарчых участках незалежных назіральнікаў. 29 прадстаўнікоў Бюро па дэмакратычных інстытутах і правах чалавека АБСЕ па-ранейшаму не могуць патрапіць у Беларусь, каб прыступіць да выканання сваёй місіі доўгатэрміновага назірання.

Мы звязаліся з Граерам Бальянам, кіраўніком аддзела па выбарах БДІПЧ, які ачольвае місію назіральнікаў для Беларусі. Сп. Бальян паведаміў нам, што па стане на ўчарашні дзень ніхто з назіральнікаў так і не змог атрымаць уязных візаў у нашу краіну.

Мы звязаліся з Граерам Бальянам, кіраўніком аддзела па выбарах БДІПЧ, які ачольвае місію назіральнікаў для Беларусі. Сп. Бальян паведаміў нам, што па стане на ўчарашні дзень ніхто з назіральнікаў так і не змог атрымаць уязных візаў у нашу краіну.

- Мы атрымалі афіцыйнае запрашэнне ад беларускага міністэрства замежных справаў прыехаць у Беларусь 15 жніўня. Мы адразу звярнуліся ў беларускую амбасаду ў Варшаве, каб атрымаць візы, бо без візаў мы не зможам патрапіць у Беларусь, але пакуль у нас няма ніякіх звестак адтуль.

- А вы спрабавалі звязвацца з персаналам амбасады, каб удакладніць тэрміны выдачы візаў?

- Так, мы знаходзімся ў кантакце з амбасадай. Нам паведамілі, што мы зможам атрымаць візы 16 або 17 жніўня. Але вось 16 ужо амаль скончылася, а візаў няма. 17 - гэта ўжо пятніца, потым будуць выхадныя... Мы гатовыя ў любы момант вылецець у Беларусь, дзве гадзіны - і мы ў Мінску. Але для гэтага патрэбны дазвол на ўезд.

- Нават калі вам пашанцуе, і вы прыедзеце 17-га, ці не запозна гэта будзе?

- Сапраўды, у любым выпадку мы прыедзем запозна. Мы ўжо прапусцілі шмат вельмі важных падзеяў - такія, як збор подпісаў за кандыдатаў, іхняя афіцыйная рэгістрацыя і пачатак перадвыбарнай кампаніі. Гэта ўсё вельмі важныя часткі выбарчага працэсу.

- Скажыце, спадар Бальян, а ці былі ў гісторыі прэцэдэнты, калі нейкая іншая краіна, якая ўваходзіць у АБСЕ, адмовіла назіральнікам АБСЕ ў прыездзе або сама вызначала тэрміны іхняга прыезду?

- Не, такога яшчэ не надаралася ніколі. Ніколі назіральнікам ад БДІПЧ АБСЕ не адмаўлялі ў дазволе прыехаць у краіну, дзе праводзяцца выбары. Беларусь - гэта першая такая краіна.

- Як вы можаце ацаніць важнасць сваёй місіі? Ці могуць іншыя краіны на падставе вашых справаздачаў не прызнаць вынікі прэзідэнцкіх выбараў у Беларусі 9 верасня?

- Я ведаю, што ўсе краіны, што ўваходзяць у АБСЕ, вельмі шчыльна сочаць за падзеямі ў вашай краіне. Яны будуць уважліва вывучаць вынікі нашай працы. Але якія палітычныя рашэнні яны будуць прымаць - гэта залежыць толькі ад іх. Мы ў гэта не можам быць уцягнутыя.

- Як вы лічыце, ці будуць прэзідэнцкія выбары ў Беларусі дэмакратычнымі, свабоднымі і справядлівымі?

- Пакуль я не прыеду ў Беларусь і не пазнаёмлюся з умовамі правядзення выбараў, я не змагу вам даць адказу на гэтае пытанне.