МАШЭРАВА СЫХОДЗІЦЬ З ДЫСТАНЦЫІ: КАМЕНТАР 4 ЛIПЕНЯ

2001-07-04

Аўтар: Аляксей ЗНАТКЕВІЧ, рэдактар сайта.

МАШЭРАВА СЫХОДЗІЦЬ З ДЫСТАНЦЫІ

Наталля Машэрава - дэпутат Палаты прадстаўнікоў і дачка дагэтуль папулярнага кіраўніка БССР Пятра Машэрава - вырашыла адмовіцца ад змагання за пасаду прэзідэнта Беларусі на сёлетніх выбарах.

Як паведаміў беларускай службе Радыё Свабода 4 ліпеня прэс-сакратар Цэнтральнай выбарчай камісіі Валерый Юрэвіч, Машэрава падала ў Цэнтрвыбаркам заяву з просьбай ануліраваць рэгістрацыю яе ініцыятыўнай групы. Паводле словаў Юрэвіча, прычыны гэтай просьбы ў заяве не тлумачацца. Цэнтрвыбаркам плануе прыняць рашэнне па заяве 5 ліпеня.

Звязацца з самой Машэравай па каментар пакуль не атрымалася. Памочніца Машэравай у Палаце прадстаўнікоў паведаміла Радыё Свабода, што да 10 ліпеня тая будзе знаходзіцца за межамі Беларусі.

Чуткі аб тым, што Машэрава здыме сваю кандыдатуру з'явіліся яшчэ на мінулым тыдні. Тады Машэрава ў інтэрв'ю БелаПАН адмовілася ад каментару. "Сітуацыя больш складаная, чым вы думаеце", - сказала яна.

Відавочна, што рашэнне Машэравай было выклікана ціскам з боку цяперашняга кіраўніцтва Беларусі. Аляксандр Лукашэнка назваў рашэнне Машэравай ісці на выбары "ударам у спіну". Апошнія апытанні паказвалі рэзкі рост папулярнасці Машэравай - у чэрвеньскім рэйтынгу Незалежнага інстытута сацыяльна-эканамічных і палітычных даследаванняў яна падзяліла другое месца з былым прэм'ер-міністрам Міхаілам Чыгіром. У адказ на "закрытае" пытанне (даваўся спіс прозвішчаў магчымых кандыдатаў і некалькі варыянтаў адказаў па кожным прозвішчы) 17 працэнтаў апытаных адказалі, што прагаласуюць за Машэраву.

Цяпер мы наўрад ці даведаемся, наколькі рэальным супернікам Лукашэнку на выбарах магла б стаць Наталля Машэрава, якая ідэалагічна вельмі блізкая да цяперашняга кіраўніка Беларусі (гл. каментар за 27 чэрвеня). Але яе сыход з выбарчай гонкі, хутчэй за ўсё, сведчыць аб тым, што Лукашэнка мае намер правесці выбары па "жорсткім" сцэнары, страхуючыся ад нечаканасцяў. Можна прагназаваць нават адмову ў рэгістрацыі ўсім больш-меньш моцным кандыдатам з "пяцёркі" дэмакратычнай апазіцыі (Уладзіміру Ганчарыку, Сямёну Домашу і Міхаілу Чыгіру), а таксама папулісту Сяргею Гайдукевічу і "наменклатуршчыкам" Міхаілу Марынічу і Леаніду Сініцыну. Тут вельмі дарэчы можа прыдасца нядаўні прэзідэнцкі дэкрэт №20, які ўводзіць абавязковае дэклараванне даходаў і маёмасці не толькі кандыдатам, але і агонымі сваякамі (у тым ліку ўнукамі, дзядулямі, бабулямі, братамі і сёстрамі).

Прысутнасць у выбарчай гонцы Машэравай, чый патэнцыйны электарат часткова супадае з Лукашэнкавым давала аналітыкам падставу казаць, што будзе ажыццяўляцца хітры сцэнар, у якім гэтыя двое выйдуць у другі тур, каб стварыць ілюзію барацьбы. Сыход жа Машэравай сведчыць аб тым, што ўсё можа быць значна прасцей і больш натуральна для характара сённяшняга кіраўніка краіны - Лукашэнка рыхтуецца абвесціць аб сваёй перамозе ў першым туры.