НАГЛЯДАЛЬНІКІ ПРЫЕДУЦЬ НА ВЫБАРЫ Ў БЕЛАРУСЬ ("Звязда")

2000-09-01

Уважліва вывучыўшы ацэнкі Кансультатыўнанаглядальнай групы (КНГ) АБСЕ, Парламенцкай тройкі, Бюро па дэмакратычных інстытутах і правах чалавека (БДІПЧ) АБСЕ, а таксама даклады ўрада Беларусі і прадстаўнікоў Кансультатыўнага савета апазіцыйных партый, канферэнцыя прыняла шэраг адпаведных заключэнняў і рэкамендацый для інстытутаў, якія ўдзельнічаюць у гэтым працэсе. У прыватнасці, было падкрэслена, што працягваецца палітычная цікавасць удзельнікаў форуму ў аказанні садзейнічання Беларусі ва ўз'яднанні з еўрапейскімі дэмакратыямі. У дакуменце асабліва адзначаны прагрэс па чатырох асноўных напрамках, што адносяцца да арганізацыі дэмакратычных выбараў, хоць, як сцвярджаецца ў заключэннях, гэты прагрэс усё яшчэ недастатковы для дасягнення ўзгодненых міжнародных крытэрыяў.

Разам з тым, змяненне рамачных умоў правядзення парламенцкіх выбараў, гаворыцца ў дакуменце, робіць магчымым накіраванне ў рэспубліку тэхнічнай місіі па ацэнцы, якая будзе арганізавана і разгорнута Бюро па дэмакратычных інстытутах і правах чалавека АБСЕ ў цесным супрацоўніцтве з Кансультатыўна-наглядальнай групай. Тэхнічная місія БДІПЧ па ацэнцы будзе ўключаць накіраванне экспертаў па выбарах на перыяд каля чатырох тыдняў.

Канферэнцыя таксама звярнулася з просьбай да парламенцкіх асамблей АБСЕ, Савета Еўропы і Еўрапарламента прадоўжыць кансультатыўную і наглядальную работу ў сувязі з маючымі адбыцца парламенцкімі выбарамі ў Беларусі. Акрамя гэтага, прадстаўнікі Парламенцкай тройкі павінны дзейнічаць у якасці міжнародных наглядальнікаў, што дасць ім магчымасць аб'ектыўна ацаніць выбарчы працэс.

Пад націскам некаторых краін і еўрапейскіх арганізацый, адзначаюць у беларускім МЗС, тэхнічная канферэнцыя ў сваіх рэкамендацыях і заключэннях зрабіла непрыемныя для Беларусі запісы. У прыватнасці, у пункце 8 сказана, што прысутнасць Парламенцкай тройкі і тэхнічнай місіі БДІПЧ на выбарах у Беларусі "не з'яўляецца актам міжнароднага прызнання дэмакратычнага характару і выніку парламенцкага працэсу". Аднак з гэтым не згадзіліся дэлегацыі СНД і Міжпарламенцкай асамблеі СНД.

Каменціруючы вынікі Венскай канферэнцыі, Павел Латушка адзначыў, што рашэнне рэкамендаваць ключавым еўрапейскім арганізацыям накіраваць у нашу краіну сваіх наглядальнікаў сведчыць аб агульным усведамленні бессэнсоўнасці ізаляцыі Беларусі. Міністэрства замежных спраў, паведаміў ён, выказвае надзею, што міжнародныя наглядальнікі дадуць аб'ектыўную і непрадузятую ацэнку маючым адбыцца парламенцкім выбарам і адпаведным чынам праінфармуюць свае арганізацыі аб іх зыходзе і выніках.

Як паведаміў журналістам міністр замежных спраў Урал Латыпаў, вынесеныя рэкамендацыі былі практычна поўнасцю прыняты да ведама пастаянным Саветам АБСЕ. Прынятыя ўдзельнікамі канферэнцыі рашэнні, паводле яго слоў, - перамога добрай волі. "Гэта кампраміс, які адкрывае дарогу міжнароднаму нагляданню за выбарамі", адзначыў міністр.