ПАЛАЦЕ ПРАДСТАЎНІКОЎ ДРУГОГА СКЛІКАННЯ НАКАНАВАНА СТАЦЬ СХОДАМ ЛЮДЗЕЙ, ЯКІЯ ВЫРАЖАЮЦЬ ТОЛЬКІ СВАЕ АСАБІСТЫЯ ІНТАРЭСЫ

Аўтар: Юрый ПАЦЁМКІН, журналіст

Два тыдні, што прайшлі з пачатку першай сесіі, вылучаліся бурнай цяжкай барацьбой за дэпутацкія партфелі і азнаменаваліся некалькімі нечаканасцямі.

Два тыдні, што прайшлі з пачатку першай сесіі, вылучаліся бурнай цяжкай барацьбой за дэпутацкія партфелі і азнаменаваліся некалькімі нечаканасцямі.
Нечаканасць першая - правал прапанаванага выканаўчай уладай рэгіянальнага прынцыпу фарміравання парламенцкіх камісій, калі кожны рэгіён павінен быў атрымаць па два старшынскіх партфелі.

З 14 парламенцкіх камісій па дзве атрымалі Мінск (па бюджэце, фінансах і падатковай палітыцы; па грашова-крэдытнай палітыцы і банкаўскай дзейнасці), Мінская вобласць (па прамысловасці, ПЭК, транспарту, сувязі і прадпрымальніцтву; па адукацыі, культуры, навуцы і навукова-тэхнічным прагрэсе), Магілёўская (па заканадаўству і судова-прававых пытаннях; па правах чалавека, нацыянальных адносінах і СМІ), Гомельская (па міжнародных справах і сувязях з СНД; па праблемах чарнобыльскай катастрофы, экалогіі і прыродакарыстанню). У той жа час Віцебская вобласць атрымала чатыры старшынскіх партфелі - у камісіях па дзяржбудаўніцтву; па жыллёвай палітыцы, будаўніцтву, гандлю і прыватызацыі; па ахове здароўя, фізічнай культуры, справах сям'і і моладзі; па аграрных пытаннях. Абдзялілі, такім чынам, Брэсцкую і Гродзенскую вобласці, якім дасталася ўсяго па адной камісіі - адпаведна, па нацыянальнай бяспецы і па працы, сацыяльнай абароне, справах ветэранаў і інвалідаў. Не быў выкананы рэгіянальны прынцып і пры выбары намеснікаў старшыняў камісій.

Такім чынам, папярэднія дамоўленасці аказаліся менш трывалымі, чым карысць асобных дэпутатаў. Нягледзячы на ўсе перадвыбарныя запэўніванні аб адданным служэнні народу, дэпутаты прадэманстравалі, што, як і кожнаму, ім уласцівы і чыста меркантыльныя меркаванні.

Другой асаблівасцю гэтай дзяльбы трэба назваць крушэнне надзей некаторых парламентарыяў першага склікання іграць дамінуючую ролю ў новым складзе палаты. Нечакана для іх высветлілася, што наваабраны дэпутацкі корпус мала хвалююць пытанні захавання пераемнасці парламенцкай дзейнасці. У выніку шэрагу ветэранаў першага склікання прыйшлося развітацца са сваімі амбіцыёзнымі планамі выконваць ролю парламенцкіх гуру і вучыць таінству заканатворчасці наваабраных калег.

Канешне, калі ацэньваць сітуацыю ў цэлым, то 9 з 14 камісій засталіся ўсё ж за дэпутатамі першага склікання. Аднак з ранейшых кіраўнікоў камісій сваю пасаду здолеў захаваць толькі Валянцін Кручкоў. Астатнія з трэскам праваліліся.

Найбольш знішчальнае паражэнне пацярпеў на выбарах былы старшыня камісіі па дзяржбудаўніцтву Анатоль Красуцкі. Усе былі ўпэўнены, што менавіта ў гэтага дэпутата, які працягнуў праз парламент спачатку антыдэмакратычны закон аб выбарах дэпутатаў мясцовых Саветаў, а потым Выбарчы кодэкс і папраўкі да яго, які актыўна ўдзельнікаў у ініцыіраваным Лукашэнкам дыялогу грамадска-палітычных сіл, - ужо ў яго праблем з пераабраннем на старшынскую пасаду не ўзнікне. Характэрны і той факт, што ніхто не адважыўся ў адкрытую аспрэчыць яго месца. Але ў выніку новыя дэпутаты ўсё ж не ацанілі заслугі Красуцкага, і на выбарах ён набраў толькі 28 галасоў.

У рэшце рэшт, антырэкорд старшынскіх выбараў паставіў нават не Красуцкі, а іншы дэпутат - галоўны рэдактар афіцыйнай урадавай газеты "Рэспубліка" Сяргей Дубовік, які выказаў жаданне ўзначаліць камісію па правах чалавека, нацыянальных адносінах і СМІ. Ён умудрыўся сабраць у сваю падтрымку... 3 дэпутацкія галасы. Відаць, не вельмі натхніла парламенцкі корпус яго кандыдацкая прамова, у якой той паабяцаў стварыць пры кожным рэспубліканскім СМІ дэпутацкі назіральны савет (мабыць, у духе назіральнага савета, ідэю якога ў расійскай Дзярждуме ўжо не адзін год спрабуе прабіць фракцыя КПРФ).

Да слова, менавіта камісія па правах чалавека ў прафесійных адносінах выглядае найменш дзеяздольнай. Па персанальнаму складу яна, хутчэй, бліжэй да аграрнай - у ёй два аграномы, старшыня Ганцавіцкага райвыканкама, кіраўнік "Магілёўнафтапрадукта" і для паўнаты карціны - усё той жа Сяргей Дубовік, экс-намеснік кіраўніка прэзідэнцкай адміністрацыі Іван Пашкевіч і пайшоўшы ў парламент як незалежны кандыдат Юрый Марозаў.

Наогул кадравая палітыка гэтага складу дэпутацкага корпусу цяжка паддаецца логіцы. Тут прысутнічаюць большай часткай эмоцыі. Пакрыўдзіўшыся за непрызнанне заслуг (а такая, паклаўшы руку на сэрца, толькі адна - у калізіі 1996 года яны сталі на бок прэзідэнта), прадстаўнікі старой парламенцкай гвардыі махнулі рукой на ранейшую спецыялізацыю і перабраліся ў новыя камісія. Так, экс-старшыню аграрнай камісіі Мікалая Куцко занясло ў бюджэтную, а былога кіраўніка бюджэтнай камісіі Аляксандра Зінчанку, наадварот, у аграрную. А можа, пасля чатырох гадоў дэпутацтва гэтыя народныя абраннікі, нарэшце, зразумелі, у чым іх сапраўднае заканатворчае прызванне?

Аплотам старой дэпутацкай гвардыі стала міжнародная камісія, якую ўзначаліў цяпер ужо былы старшыня Палаты прадстаўнікоў Анатоль Малафееў. З 10 яе членаў, уключаючы ўсіх намеснікаў старшыняў, 8 прадстаўляюць першае скліканне. Гэта, напэўна, адзінае заваяванне, якое ўдалося адстаяць ветэранам. Праўда, у такім выпадку становіцца зусім незразумелым, якім чынам Палата прадстаўнікоў збіраецца вырашаць праблему міжнароднага непрызнання. Таму што прадстаўнікі цывілізаваных еўрапейскіх дзяржаў наўрад ці стануць сур'ёзна размаўляць з Анатолем Малафеевым або такімі адыёзнымі фігурамі, як Сяргей Касцян і Аляксандр Шпілеўскі. У той жа час, здаецца, адзіны дэпутат, чый дэмакратычны імідж мог садзейнічаць наладжванню кантактаў з заходнімі парламентамі - лідэр Беларускага грамадскага аб'яднання "Яблоко" Вольга Абрамава, - аказалася па волі лёсу і парламентарыяў у камісіі па заканадаўству.

Яшчэ адной знамянальнай падзеяй у навапарламенцкай гісторыі стала раздрабленне на дзве паловы эканамічнай камісіі, чаго здолелі дамагчыся прыйшоўшыя ў Авальную залу прадстаўнікі буйнога нафтагазавага і гандлёва-прамысловага капіталу. Яны ж гэтыя камісіі і ўзначалілі. У прыватнасці, па прамысловасці, ТЭК, транспарту, сувязі і прадпрымальніцтву - прэзідэнт ЗАТ "БелАўтагаз" Міхаіл Баравы з намеснікамі старшыні - прэзідэнтам Беларускага гандлёва-фінансавага саюза, у мінулым прэм'ер-міністрам Вячаславам Кебічам і генеральным дырэктарам "БелРасУкрнафты" Мікалаем Скутавым. Камісію па жыллёвай палітыцы, будаўніцтву, гандлю і прыватызацыі атрымалі ў падпарадкаванне прэзідэнт Беларускай асацыяцыі "Нерухомасць" Васіль Хрол, які ўзяў сабе ў намеснікі намесніка генеральнага дырэктара "Інстытута нерухомасці і ацэнкі" Кірыла Халопіка. Яшчэ адзін вядомы ў Беларусі прадпрымальнік - генеральны дырэктар фірмы "Лада-ОМС" Аляксей Ваганаў узначаліў камісію па грашова-крэдытнай палітыцы і банкаўскай дзейнасці. Ваганаў хаця і не банкір, але грошы лічыць умее.

Такім чынам, можна гаварыць, што Беларусь, здаецца, атрымала горшы з магчымых варыянтаў заканадаўчага органа. Мяркуючы па ўсім, Палаце прадстаўнікоў другога склікання наканавана стаць сходам людзей, якія выражаюць толькі свае асабістыя інтарэсы. У сваю чаргу, дэпутаты, якія добрасумленна абслугоўваюць уладу, атрымаюць ад яе максімальныя прэферэнцыі для развіцця ўласнага бізнесу або наступнага кадравага росту. Гэта, мабыць, і будзе новае, канструктыўнае супрацоўніцтва дзвюх галін улады паводле Аляксандра Лукашэнкі.

***

Ніжэй прапаноўваецца спіс камісій ніжняй палаты парламента новага склікання.

Пастаянная камісія па заканадаўству і судова-прававых пытаннях

1. старшыня - Архіпаў Аляксандр Міхайлавіч (пракурор Ленінскага раёна Магілёва)

намеснікі старшыні

2. Мірановіч Міхаіл Сяргеевіч (пракурор Кастрычніцкага раёна Гомеля)

3. Праташчык Марыя Сямёнаўна (старшыня Камітэта дзяржаўнага кантролю Гродзенскай вобласці)

4. Салаўёў Анатоль Міхайлавіч (намеснік начальніка УУС Гомельскага аблвыканкама)

член камісіі

5. Абрамава Вольга Міхайлаўна (дырэктар навуковых і адукацыйных праграм аналітычнага цэнтра "Стратэгія", лідэр Беларускага грамадскага аб'яднання "Яблоко")

Пастаянная камісія па нацыянальнай бяспецы

1. старшыня - Бікінін Барыс Сцяпанавіч (намеснік міністра па надзвычайных сітуацыях)

намеснікі старшыні

2. Гаргун Васіль Сцяпанавіч (зааінжынер, дэпутат першага склікання Палаты прадстаўнікоў, член Рэспубліканскай партыі працы і справядлівасці)

3. Кібак Іван Аляксеевіч (старшы выкладчык Акадэміі МУС Рэспублікі Беларусь)

4. Марозаў Уладзімір Іванавіч (намеснік начальніка ўпраўлення Камітэта дзяржаўнай бяспекі па Магілёўскай вобласці)

5. Сімірскі Валянцін Раманавіч (генеральны дырэктар Швейцарскага прадстаўніцтва АТ "Нелант")

члены камісіі

6. Іваненка Пётр Іванавіч (намеснік генеральнага пракурора)

7. Бабкоў Анатоль Канстанцінавіч (эканаміст, юрыст, старшыня камісіі па заканадаўству першага склікання Палаты прадстаўнікоў)

8. Рэзнікаў Уладзімір Аляксеевіч (намеснік начальніка ўпраўлення Камітэта дзяржаўнай бяспекі па Брэсцкай вобласці)

9. Андрэеў Юрый Іванавіч (ваеннаслужачы)

10. Фралоў Валерый Дзмітрыевіч (ваеннаслужачы)

Пастаянная камісія па дзяржаўнаму будаўніцтву, мясцоваму самакіраванню і рэгламенту

1. старшыня - Сасонка Міхаіл Паўлавіч (інжынер, намеснік старшыні гэтай камісіі ў першым складзе Палаты прадстаўнікоў)

намеснікі старшыні

2. Лукашэвіч Уладзімір Васільевіч (старшыня Ваўкавыскага райвыканкама)

3. Семяненя Іван Георгіевіч (загадчык Любанскай юрыдычнай кансультацыі)

4. Орда Міхаіл Сяргеевіч (другі сакратар ЦК БПСМ)

член камісіі

5. Навасяд Уладзімір Уладзіміравіч (юрысконсульт газеты "Молодежный проспект")

Пастаянная камісія па аграрных пытаннях

1. старшыня - Азарчонкаў Аляксандр Міхайлавіч (інжынер-механік, член гэтай камісіі ў першым складзе Палаты прадстаўнікоў, член Аграрнай партыі)

намеснікі старшыні

2. Здановіч Станіслаў Тадэвушавіч (старшыня Слонімскага райвыканкама)

3. Зінчанка Аляксандр Мікалаевіч (эканаміст, старшыня бюджэтнай камісіі ў першым складзе Палаты прадстаўнікоў)

4. Разынка Пётр Міхайлавіч (ветэрынарны ўрач, дэпутат першага склікання Палаты прадстаўнікоў)

член камісіі

5. Папруга Валянцін Аляксеевіч (старшыня калгаса "Прагрэс" Светлагорскага раёна, член Аграрнай партыі)

Пастаянная камісія па адукацыі, культуры, навуцы і навукова-тэхнічным прагрэсе

1. старшыня - Катляроў Ігар Васільевіч (інжынер, сацыёлаг, намеснік старшыні камісіі па правах чалавека і нацыянальных адносінах у першым скліканні Палаты прадстаўнікоў, член КПБ)

намеснік старшыні

2. Аўдзеева Таццяна Пятроўна (старшыня Магілёўскага абкама прафсаюза работнікаў культуры)

3. Дзялендзік Уладзімір Віктаравіч (генеральны дырэктар вытворчага унітарнага прыватнага прадпрыемства "Дарыда")

4. Здановіч Уладзімір Мацвеевіч (дырэктар Драгічынскай гімназіі)

члены камісіі

5. Захарчанка Валерый Мікалаевіч (намеснік старшыні Брэсцкага аблвыканкама, член КПБ)

6. Печанькоў Уладзімір Пятровіч (дырэктар Аршанскай школы-гімназіі № 19)

7. Парошын Сяргей Іванавіч (намеснік кіраўніка адміністрацыі Савецкага раёна Гомеля)

8. Янчэўскі Усевалад Вячаслававіч (першы сакратар БПСМ)

Пастаянная камісія па правах чалавека, нацыянальных адносінах і сродках масавай інфармацыі

1. старшыня - Ліпкін Валерый Фёдаравіч (аграном, генеральны дырэктар аграгандлёвай фірмы "Днепр")

намеснікі старшыні

2. Анікееў Міхаіл Міхайлавіч (аграном, дацэнт кафедры раслінаводства БСГА, член КПБ)

3. Свірыд Аляксандр Уладзіміравіч (старшыня Ганцавіцкага райвыканкама, член КПБ)

4. Чачора Аляксандр Васільевіч (генеральны дырэктар ВА "Магілёўнафтапрадукт")

члены камісіі

5. Пашкевіч Іван Іванавіч (былы намеснік кіраўніка Адміністрацыі прэзідэнта, член Сацыял-дэмакратычнай партыі народнай згоды)

6. Дубовік Сяргей Валянцінавіч (галоўны рэдактар афіцыйнай урадавай газеты "Республика")

7. Марозаў Юрый Анатольевіч (намеснік генеральнага дырэктара беларуска-германскага СП "Белфарм")

Пастаянная камісія па міжнародных справах і сувязях з СНД

1. старшыня - Малафееў Анатоль Аляксандравіч (былы старшыня Палаты прадстаўнікоў)

2. Касцян Сяргей Іванавіч (настаўнік, намеснік старшыні гэтай камісіі ў першым скліканні Палаты прадстаўнікоў, член КПБ)

3. Шпілеўскі Аляксандр Францавіч (юрыст, намеснік старшыні гэтай камісіі ў Палаце прадстаўнікоў першага склікання)

4. Красуцкі Анатоль Віктаравіч (юрыст, старшыня камісіі па дзяржбудаўніцтву ў першым скліканні Палаты прадстаўнікоў)

члены камісіі

5. Астапчанка Юрый Леанідавіч (генеральны дырэктар - старшыня савета дырэктараў канцэрна "Белрэсурсы")

6. Кучынскі Віктар Францавіч (памочнік прэзідэнта - дырэктар Дэпартамента па гуманітарнай дзейнасці пры прэзідэнце Беларусі)

7. Лосеў Андрэй Ціханавіч (дырэктар ААТ "Гроднааптгандаль", член КПБ)

8. Машэрава Наталля Пятроўна (намеснік начальніка галоўнага ўпраўлення сакратарыята Парламенцкага сходу Саюза Беларусі і Расіі)

9. Пянькова Зінаіда Васільеўна (старшыня Магілёўскага гарадскога Савета дэпутатаў)

10. Вінакурава Марыя Міхайлаўна (дырэктар арэнднага прадпрыемства "Бабруйскі завод буйнапанэльнага домабудавання")

Пастаянная камісія па праблемах чарнобыльскай катастрофы, экалогіі і прыродакарыстанню

1. старшыня - Кручкоў Валянцін Пятровіч (старшыня гэтай камісіі ў першым скліканні Палаты прадстаўнікоў, член Аграрнай партыі)

намеснікі старшыні

2. Дзервянкоў Уладзімір Іванавіч (кіраўнік адміністрацыі Цэнтральнага раёна Гомеля)

3. Кулік Віталій Васільевіч (дырэктар ТАА "Рэчыцкі камбінат хлебапрадуктаў", член Аграрнай партыі)

4. Худая Марыя Мікалаеўна (намеснік старшыні гэтай камісіі ў першым скліканні Палаты прадстаўнікоў)

члены камісіі

5. Семянюк Уладзімір Дзмітрыевіч (дырэктар дзяржаўнай лесагаспадарчай установы "Шчучынскі лясгас")

6. Сіняк Эдуард Паўлавіч (галоўны ўрач Барысаўскага раённага тэрытарыяльнага медыцынскага аб'яднання)

7. Логвін Валерый Мікалаевіч (галоўны рэдактар газеты "Гомельская праўда")

Пастаянная камісія па бюджэце, фінансах і падатковай палітыцы

1. старшыня - Кісялёў Сяргей Антонавіч (начальнік інспекцыі № 1 Дзяржаўнага падатковага камітэта па Фрунзенскаму раёну Мінска)

намеснікі старшыні

2. Куцко Мікалай Васільевіч (старшыня аграрнай камісіі ў першым скліканні Палаты прадстаўнікоў, член Аграрнай партыі)

3. Марахін Віктар Іванавіч (ваеннаслужачы)

4. Скрабец Сяргей Мікалаевіч (генеральны дырэктар ЗАТ "Гандлёвы дом "БелБабаеўскае")

члены камісіі

5. Александровіч Уладзімір Аляксандравіч (генеральны дырэктар ЗП "Ітэра-Бел", старшыня Беларускай сацыяльна-спартыўнай партыі)

6. Баслык Ігар Уладзіміравіч (дырэктар птушкафабрыкі "Зара камунізму")

Пастаянная камісія па грашова-крэдытнай палітыцы і банкаўскай дзейнасці

1. старшыня - Ваганаў Аляксей Васільевіч (генеральны дырэктар СП "Лада-ОМС", член Ліберальна-дэмакратычнай партыі)

намеснікі старшыні

2. Бародка Мікалай Іванавіч (урач тэрытарыяльнага медыцынскага аб'яднання № 3 Гомеля)

3. Мычко Іван Мікалаевіч (намеснік старшыні Маскоўскага райвыканкама Мінска)

члены камісіі

4. Калугін Пётр Аляксеевіч (генеральны дырэктар ВА "Беларуськалій")

5. Глухоўскі Леанід Віктаравіч (намеснік міністра ўнутраных спраў - начальнік Следчага камітэта пры МУС)

6. Парфяновіч Віктар Пятровіч (галоўны ўрач Лагойскага раённага тэрытарыяльнага медыцынскага аб'яднання)

Пастаянная камісія па працы, сацыяльнай абароне, справах ветэранаў і інвалідаў

1. старшыня - Камянецкі Сяргей Уладзіміравіч (старшыня Гродзенскай абласной арганізацыі грамадскага аб'яднання "Беларускі саюз ветэранаў вайны ў Афганістане")

намеснікі старшыні

2. Дылеўскі Генадзь Юльянавіч (генеральны дырэктар ТАА "Уладыка")

3. Гаварушкін Станіслаў Мікалаевіч (начальнік упраўлення аховы здароўя Мінскага аблвыканкама)

члены камісіі

4. Дуніч Мікалай Уладзіміравіч (старшыня Іўеўскага райвыканкама)

5. Ананьеў Раман Уладзіслававіч (прэзідэнт ЗАТ "Белнафтагаз")

6. Нятылькін Анатоль Іванавіч (старшыня Цэнтральнага праўлення грамадскага аб'яднання "Беларускае таварыства інвалідаў па зроку", старшыня Рэспубліканскай партыі працы і справядлівасці)

Пастаянная камісія па ахове здароўя, фізічнай культуры, справах сям'і і моладзі

1. старшыня - Лектараў Валерый Мікалаевіч (начальнік упраўлення аховы здароўя Віцебскага аблвыканкама)

намеснікі старшыні

2. Дубовік Мікалай Мікалаевіч (намеснік старшыні камісіі па працы, сацыяльных пытаннях, ахове здароўя, фізічнай культуры і спорту ў першым скліканні Палаты прадстаўнікоў)

3. Парфяновіч Уладзімір Уладзіміравіч (прэзідэнт ТАА "Беларускае агенцтва фінансавых інвестыцый")

4. Ісаеў Уладзімір Міхайлавіч (галоўны ўрач Полацкага тэрытарыяльнага медыцынскага аб'яднання)

члены камісіі

5. Жукевіч Міхаіл Рыгоравіч (першы сакратар Гомельскага абласнога камітэта грамадскага аб'яднання "Беларускі саюз моладзі")

6. Ткачук Наталля Аляксандраўна (галоўны ўрач Дзісненскай раённай бальніцы Мёрскага тэрытарыяльнага медыцынскага аб'яднання)

7. Часнойць Роберт Аляксандравіч (начальнік упраўлення аховы здароўя Гродзенскага аблвыканкама)

Пастаянная камісія па жыллёвай палітыцы, будаўніцтву, гандлю і прыватызацыі

1. старшыня - Хрол Васіль Пятровіч (прэзідэнт Беларускай асацыяцыі "Нерухомасць")

намеснікі старшыні

2. Бурава Ганна Мікалаеўна (дырэктар даччынага унітарнага прадпрыемства "Вытворчы гандлёвы камбінат "Хваля" Гродзенскага рэспубліканскага унітарнага прадпрыемства "Радыёхваля")

3. Голубева Таццяна Генадзьеўна (намеснік міністра архітэктуры і будаўніцтва)

4. Халопік Кірыл Вадзімавіч (намеснік генеральнага дырэктара рэспубліканскага унітарнага прадпрыемства "Інстытут нерухомасці і ацэнкі")

члены камісіі

5. Мельнікаў Іван Васільевіч (начальнік цэха рэспубліканскага унітарнага прадпрыемства "Беларускі металургічны завод")

6. Наважылаў Леў Вітальевіч (намеснік дырэктара Наваполацкага дзяржаўнага даччынага прадпрыемства "Хакейны клуб "Хімік" вытворчага аб'яднання "Палімір")

7. Лойка Уладзімір Вікенцьевіч (намеснік генеральнага дырэктара ВА "БелАЗ")

Пастаянная камісія па прамысловасці, паліўна-энергетычнаму комплексу, транспарту, сувязі і прадпрымальніцтву

1. старшыня - Баравы Міхаіл Іванавіч (прэзідэнт ЗАТ "БелАўтагаз")

намеснікі старшыні

2. Скутаў Мікалай Рыгоравіч (генеральны дырэктар беларуска-расійска-украінскага сумеснага прадпрыемства ЗАТ "БелРасУкрнафта")

3. Забалоцец Сяргей Макаравіч (намеснік начальніка ўпраўлення матэрыяльнага забеспячэння ДП "Мінскі аўтамабільны завод")

4. Паплаўскі Міхаіл Іванавіч (дырэктар рагачоўскага завода "Дыяпраектар")

члены камісіі

5. Кебіч Вячаслаў Францавіч (прэзідэнт Беларускага гандлёва-фінансавага саюза)

6. Жвікаў Уладзімір Уладзіміравіч (начальнік Аршанскага лакаматыўнага дэпо)